19.09.2008.№15-16 (427-428)
“Mən hər bir Azərbaycan vətəndaşının Prezidenti olacağam”. Bu sözlər hörmətli Prezidentimiz İlham Əliyev tərəfindən ilk dəfə 15 oktyabr 2003-cü ildə səslənmişdir. Məhz həmin vaxtdan İlham Əliyev müqəddəs Qurana, Azərbaycan Respublikasının Konstitusiyasına and içərək xalqa, dövlətinə daha sədaqətlə xidmət etməyə başlamışdır. Günlər ötdükcə həmin tarixi gün bizə daha da yaxınlaşır və doğmalaşır. Təbii ki, bunun da öz səbəbləri var. Xalqımızın tarixində əlamətdar günlərin sayı kifayət qədərdir. Onların hər birinin yaranma tarixi də hər kəsə aydındır. Bu ilin oktyabr ayının 15-də İlham Əliyevin Prezident seçilməsinin beşinci ildönümü xalqımız tərəfindən daha böyük sevinclə qeyd olunacaqdır. Ölkədə görülən nəhəng işlərə bir daha nəzər salınacaqdır və söz yox ki, İlham Əliyevin ikinci dəfə yenidən ölkə prezidenti seçiləcəyinə də heç bir şübhə yoxdur.
Bəli, son beş ildə olduğu kimi, bundan sonra da İlham Əliyevin rəhbərliyi altında ölkəmiz inkişaf edəcəkdir. Təbii ki, bu prosesdə hamımız birlikdə iştirak etməli, gənc Prezidentimizə dəstək olmalıyıq.
“ŞƏKİNİN SƏSİ” - “İPƏKÇİ”
HEYDƏR ƏLİYEVLƏ MOSKVADA - ZƏRİFƏ XANIM ƏLİYEVANIN MƏZARI ÜSTƏ, UNUDULMAZ BİR GÖRÜŞÜMÜ XATIRLAYARKƏN...
Əmir ŞABANOV,
Şəki rayonu, Daşüz kənd sakini
1987-ci ilin yayında ət-süd sənayesi işçiləri üçün Moskva Ət-Süd Sənaye Texnologiyası İnstitutunda ət kombinatları baytar nəzarəti şöbələri rəislərinin təkmilləşdirilmə kursu təşkil olunmuşdu. Həmin kursa ölkənin ət kombinatlarının baş baytar həkimləri də dəvət olunmuşdular. O cümlədən Şəki ət-süd kombinatının baş baytar həkimi kimi mən də onlarla birlikdə idim. Sovetlər dövründə Azərbaycan Kommunist Partiyası Mərkəzi komitəsinin birinci katibi olmuş Heydər Əliyevin böyük, istedadlı bir şəxsiyyət olduğuna görə ona şəxsi rəğbətim, hədsiz hörmətim, bilik və bacarığına xüsusi vurğunluğum var idi. O vaxtlar Bakıda - Oftalmologiya İnstitutunda çalışan məşhur göz həkimi Zərifə Əliyevaya müraciət etdim. Sadə kənd adamı olan qaynanam Alagöz xanımla tamamilə görmə qabiliyyətini itirmiş halda onun qəbuluna düşdük. Və dərhal cərrahiyyə əməliyyatı aparıldı və gözləri görməyə başladı. Və bundan sonra 18 il Zərifə xanımın verdiyi işıqla həyatını başa vurdu. Əlbəttə, yazılışı rahat olan bu əhvalatı xatırlamaq çətin olmasa da belə bir yaxşılığı, köməyi unutmaq olmazdı. Bax, buna görə Heydər Əliyev ailəsinə əbədi minnətdaram. Onların əziz xatirəsini qəlbimdə daim hörmətlə yaşadır və yaşadacağıq.
Mən Moskvada təkmilləşmə kursunda olarkən Heydər Əliyev şəxsiyyətinə olan hədsiz hörmət və ehtiramımı bildirmək məqsədilə Moskvada dəfn olunmuş hörmətli alimimiz, Heydər Əliyevin yaxın silahdaşı, ömür-gün yoldaşı, qayğıkeş insan Zərifə xanım Əliyevanın məzarını ziyarət etməyi, onun ruhuna dua oxumağı qərara aldım. Təkmilləşdirmədə kurs yoldaşım - Minski Ət kombinatının baş baytar həkimi Vladimirlə gül dəstələri alıb, "Novodeviçi" qəbristanlığına gəldik. Qəbristanlıqda dayanan insanların sayı-hesabı yox idi. Qapıda polis oxranası dayanmışdı… Bura gələnləri yoxlayıb sonra qəbristanlığa buraxırdılar. Mən belorus yoldaşımı göndərdim ki, "bizə daxil olmağa imkan varmı, hansı sənədlər tələb olunur". O polis işçilərinə müraciət etdikdə dedilər ki, Moskva Şəhər İcrayə Komitəsindən buraxılış icazəsi olmadan daxil olmaq mümkün deyil. Mən çox məyus oldum ki, içəri daxil ola bilməyəcəyəm. Mən qapıda dayanan polis işçilərinə baxdım. Və gördüm ki, polis işçilərindən kapitan rütbəli bir şəxs sifətindən Qafqaz millətinə oxşayır. Fikrimə gəldi ki, bu adam erməni ola bilər, qoy ona yalan bir fənd işlədim. Onu da bilirdim ki, Anastas Mikoyan da bu qəbritstanlıqda basdırılıb. Mən həmin kapitana yaxınlaşdıqda, soruşdu ki, "Sizə nə lazımdır, cavan oğlan?" Mən ona dedim ki, Anostas İvanoviç Mikoyanın qohumuyam, xahiş edirəm ki, icazə verin, onun qəbrini ziyarət edim. Məndən soruşdu ki, neçə nəfərsiniz? Dedim iki. Dedi keçin!
Bu yalanla mən qəbristanlığa daxil ola bildim. Gəzə-gəzə mərhum Zərifə xanımın qəbrini tapdım. Qəbrə yaxınlaşanda mən tarixi, unudulmaz mənzərənin şahidi oldum. Qəbir adi müsəlman qaydasında içi torpaqlı, qırağı sementdən, ətrafı dəmir reşotka, başında çekankadan portreti, anadan olma, ölüm tarixçələri, ayaq tərəfində adı maşınkada çap olunmuş Azərbaycan şairinin rus dilinə tərcümə olunmuş şeiri asılmışdı. Portretin yanında gözü yaşlı dayanmış ulu öndərimiz Heydər Əliyevi görəndə gözlərimə inanmadım. Yanında da iki nəfər kişi vardı. Çaşqınlığımdan özümü itirmişdim, gül dəstələrini qəbrin üstünə qoyub xeyli dayandıqdan sonra özümə gəldim. Sonra ulu öndərimiz Heydər Əliyevlə salamlaşıb - əl görüşü etdim. Rəhmətlik özü də bu qəriblikdə belə vəziyyətdən sonra toxtadı, sakitləşdi. Məndən soruşdu ki, nə əcəb, sən bu qəbristanlığa necə gəlib çıxmısan?
Mən ona dedim ki, hörmətli Heydər Əliyev, Azərbaycana rəhbərlik etdiyiniz dövrdə sizin fitri istedadınıza, böyük rəhbərlik qabiliyyətinizə, təşkilatçılığınıza, SSRİ rəhbərlərinin içərisində öz bilik və bacarığınızla seçilməyinizə daim qibtə etmişəm. Bununla bərabər, mərhum həyat yoldaşınızın - Zərifə xanımın mənim qaynanamın yenidən gözünün işığının qaytarılmasında köməyi bizim üçün unudulmazdır. Ümumiyyətlə, mən Heydər Əliyev nəslinin vurğunuyam, onun Azərbaycana çəkdiyi zəhməti, bəlkə də dünyada heç bir vətən oğlu çəkmədiyini yaxşı bilirəm. Sonra məndən soruşdu ki, Azərbaycanda vəziyyət necədi? Mən qısaca dedim ki, Heydər Əliyeviç, Azərbaycan idarə olunmur, vəziyyət çətindir.
Sonra xeyli söhbət etdik. Mənim bu ziyarətimdən razı qalıb təşəkkür etdi. Axırda mənə dedi ki, mən Azərbaycana qayıtsam mütləq yanıma gələrsən. Bax, belə ulu öndər Heydər Əliyevlə və mərhum Zərifə xanımla vidalaşdım. Ulu öndərimiz xalqımızın çağırışı ilə ikinci dəfə hakimiyyətə gələndən sonra mən dəfələrlə onun qəbuluna düşmək xahişi ilə etdiyim müraciətlər cavabsız qaldı. Bilirsiniz ki, mənim məktublarım ona çatdırılmayıb. Çünki onun sadə vətəndaş kimi Moskvada etdiyi söhbət elə bir dərin yaddaşı olan insanın yadından çıxa bilməzdi.
İndi Heydər Əliyevin qurduğu müstəqil Azərbaycan Dövləti inamla inkişaf edir və dünya dövlətləri içərisində layiqli yer tutur. Bu dövlətə Heydər Əliyev zəkasının davamçısı, onu tərbiyəsindən, siyasi təlimindən dərs almış cənab İlham Əliyev başçılıq edir. Ulu öndərimiz Heydər Əliyev demişdi: "Mən İlhama özüm qədər inanıram." Heydər Əliyevin bu uzaqgörənliyi öz həyatı gerçəkliyini tapmışdır. İndi İlham Əliyevin rəhbərliyi ilə Azərbaycan durmadan inkişaf edir.
Qarşıdan prezident seçkiləri gəlir, böyük tarixi hadisə durur. Heç şübhə etmirəm ki, ulu öndərimizin layiqli davamçısı İlham Əliyev bu prezident seçkilərində də yenidən ölkə prezidenti seçiləcək və bütün xalqımız ona səs verəcəkdir.
ŞƏKİ MÜƏLLİMLƏRİNİN SENTYABR KONFRANSINDA:
ŞƏKİ ŞƏHƏR TƏHSİL ŞÖBƏSİNİN MÜDİRİ FİRƏDUN İBRAHİMOVUN “2007-2008-Cİ DƏRS İLİNİN YEKUNLARI VƏ QARŞIDA DURAN VƏZİFƏLƏR HAQQINDA” HESABAT MƏRUZƏSİNİ DİNLƏYƏRKƏN...
Sabit Rəhman adına Dövlət Dram Teatrının binasında Şəki Şəhər Təhsil işçilərinin keçirilmiş sentyabr 2008-ci il konfransında hesabat məruzəsi ilə çıxış edən Şəki Təhsil şöbəsinin müdiri Firədun İbrahimov məruzəsini bu sözlərlə başladı:
-Əsası ulu öndərimiz Heydər Əliyev tərəfindən qoyulmuş siyasi və iqtisadi kursun Prezident İlham Əliyev tərəfindən uğurla davam etdirilməsi nəticəsində Azərbaycan dünyada siyasi cəhətdən ən stabil ölkələr sırasına çıxmış, iqtisadi inkişaf tempinə görə lider ölkəyə çevrilmiş, bununla da sosial-mədəni sahələrin, o cümlədən burada təhsilin inkişafı üçün hərtərəfli şərait yaranmışdır.
Son illər ərzində respublikanın təhsil sistemində davamlı inkişafa yönəlmiş əsaslı infrastruktur dəyişiklərinin baş verməsi, inkişafı yönülmlü proqram və laiyhələrin həyata keçirilməsi dövlətimizin başçısının təhsilə göstərdiyi müntəzəm diqqət və qayğısı sayəsində mümkün olmuşdur. Ölkə rəhbərinin diqqət və qayğısı, təhsil sahəsində çalışan insanların fədakar əməyi nəticəsində 2007-2008-ci tədris ilində Şəkidə də təhsil sahəsində əksər məqsədlərə demək olar ki, nail olunmuş, irəliyə doğru bir sıra həlledici addımlar atılmışdır.
Məruzəçi faktlara istinad edərək konfrans iştirakçılarının nəzərinə çatdırdı ki, ötən dərs ilində Şəkidə 101 ümumtəhsil məktəbi üzrə 1864 sinif komplektində 28419 nəfər şagird təhsilə cəlb edilmişdir. Şəhər Qarışıq Tipli İnternat məktəbində əqli və fiziki cəhətdən qüsurlu uşaqlar üçün 10 sinif təşkil olunmuş və 45 nəfər uşaq təhsil almışdır. Həmin qəbildən olan 101 nəfər uşaq isə evdə fərdi qaydada təhsillə əhatə olunmuşdur. Lazımi şərait olmadığından və fəaliyyəti özünü doğrultmadığından 42 sayda günüuzadılmış qrupun fəaliyyəti dayandırılmışdır.
Firudin müəllim onu da qeyd etdi ki, Dünya Bankının maliyyə dəstəyi ilə həyata keçirilən Təhsil Sektorunun İnkişafı Layihəsi çərçivəsində respublikamızda bu gün təhsilin məzmununda islahatlar aparılır. İslahatların əhəmiyyəti istiqamətlərindən biri də yeni qiymətləndirmə sisteminin yaradılmasıdır ki, bu istiqamətdə orta təhsil kursu üzrə buraxılış imtahanlarının mərkəzləşdirilmiş qaydada keçirilməsi sahəsində atılmış addımlar təhsilin keyfiyyətinin yaxşılaşdırılmasına, təhsilə münasibətdə şagird və müəllimlərin, məktəb rəhbərlərinin, eləcə də valideynlərin məsuliyyətinin artırılmasına xidmət edir.
Məruzədə bir daha qeyd edildi ki, respublika təhsil nazirinin əmri ilə bir sıra rayonlarda, o cümlədən Şəki şəhərində XI siniflərdə buraxılış imtahanları cavab kartı tətbiq edilmədən test üsulu ilə mərkəzləşmiş qaydada aparılmışdır. İmtahanlarda uğurlu nəticələr əldə olunması şagird və valideynlərin bu işə psixoloji baxımdan hazırlanması üçün bir sıra tədbirlər görülmüş, tədris ili müddətində 2 dəfə sınaq imtahanları keçirilmişdir. İlk dəf keçirilməsinə baxmayaraq XI siniflərdə mərkəzləşmiş qaydada aparılmış buraxılış imtahanlarının nəticələrini uğurlu hesab etmək olar. Belə ki, imtahanlarda iştirak etmiş 2307 nəfər məzundan 2159 nəfəri müvəffəq qiymət alaraq orta təhsili başa vurmuşdur. Ümumiyyətlə, 2007-2008-ci tədris ilinin nəticələrinə görə Şəkinin ümumtəhsil məktəblərinin dərs ilinin sonuna qalmış 28307 nəfər şagirdindən 27461 nəfəri yuxarı siniflərə keçmiş və ya məktəbi bitirmişdir. 62 nəfəri payız imtahanına saxlanmış, 58 nəfər yay tapşırığı almış, 262 nəfər təkrar sinifdə qalmışdır. XI siniflərdə buraxılış imtahanlarında iştirak etmiş şagirdlərdən 148 nəfəri test çalışmalarının öhdəsindən gələ bilməyərək, orta təhsil haqqında attestat ala bilməmişdir. Bu da nəzərə çatdırıldı ki, icbari təhsilin həyata keçirilməsində şagirdlərin hərəkətinin və dərsə davamiyyətinin uçota alınmasında digər nöqsan və çatışmazlıqlar da olmuşdur. Belə ki, tədris ili ərzində 132 nəfər təhsildən yayınmış, 101 nəfər isə başqa səbəblərdən məktəbi tərk etmişdir. Təkrar sinifdə saxlanılan 262 şagirddən 148 nəfəri uzun müddət dərsə davam etmədiyi üçün biliyi qiymətləndirilməyənlər olmuşdur. XI sinif məzunlarından 31 nəfəri imtahana gəlməmişdir.
Məruzəçi və məruzə ətrafında çıxış edən 5 saylı orta məktəbin coğrafiya müəllimi Dilbazi Cəmilov, 10 saylı orta məktəbin müəllimi Svetlana Bəkirova, Orta Zəyzid kənd orta məktəbinin direktoru Ələddin Əhmədov, 11 saylı orta məktəbin müəllimi Xatirə Abdullayeva öz çıxışlarında göstərdilər ki, məktəb direktorları icbari təhsilin həyata keçirilməsinə daha məsuliyyətlə yanaşmalı, şagirdlərin hərəkətinin - dərsə davamiyyətinin uçota alınmasına dair mövcud olan qaydalara ciddi əməl olunmasını təmin etməlidirlər.
Qeyd olundu ki, rayonda təlimin məzmununa müasir yanaşmaları özündə əks etdirən yeni fənlər təhsilin keyfiyyətində xeyli müsbət irəliləyişlərin əldə olunacağından xəbər verir. Bu məqsədlə "ümumi təhsilin konsepsiyası hazırlanmış, onların tətbiqinə 2008-2009-cu dərs ilindən başlanacaqdır. I siniflər üzrə kurrikulumun tətbiqi ilə əlaqədar 2 nəfər Azərbaycan dili və ədəbiyyatı, riyaziyyat fənnləri üzrə metodistlər, 8 nəfər ibtidai sinif müəllimi Azərbaycan Müəllimlər İnstitutunda keçirilən tədbirlərdə iştirak etmişdir. Respublika Təhsil Nazirliyinin xətti ilə 2008-2009-cu tədris ilində II siniflərdə dərs dinləməsi nəzərdə tutulan bütün müəllimlər üçün 23-28 iyun 2008-ci il tarixlərdə treninqlər təşkil olunmuş və onlara müvafiq sertifikatlar verilmişdir.
Məruzədə göstərildi ki, ötən dərs ilində pedaqoji kadrların fasiləsiz təhsilinin təmin edilməsi məqsədilə "Sifariş təklif" prinsipi əsasında 17 kateqoriya üzrə 311 nəfər pedaqoji kadr ixtisasartırma kursundan keçmişdir. 2007-2008-ci tədris ilində müasir təlim metodlarından öyrə- nilməsi və tətbiqi müəllimlərin fəal təlim metodlarından, yeni pedaqoji texnologiyalardan istifadə etməklə, şagird fəallığının artırılması əsas diqqət yetirilən sahələrdən biri olmuşdur. Təhsil Nazirliyinin "İxtisasartırma” sistemində yeni mexanizmlərə keçid və müəllimlərin təkmilləşməsi işinin təşkili barədə" kollegiya qərarına istinadən yaradılmış dayaq məntəqələri də pedaqoji işçilərin təkmilləşdirilməsi işində öz fəaliyyətlərini uğurla davam etdirmişlər.
Bu da bir həqiqətdir ki, ümumi təhsilin davamlı inkişafında müəllimin pedaqoji hazırlığı, yaradıcılığı müasir dünyaya baxışı, şəxsi təhsili çox mühüm rol oynayır. Bunu anlayan Şəkinin ümumtəhsil məktəblərinin qabaqcıl müəllimləri respublika Təhsil Nazirliyinin, Qeyri-Hökumət təşkilatlarının və İctimai Birliklərinin təhsillə bağlı həyata keçirdikləri layihələrdə fəallıqla iştirak edirlər.
Məruzəçi bildirdi ki, Azərbaycan Respublikası Təhsil Nazirliyi, Müasir Təhsil və Tədrisə Yardım Mərkəzi, "İnnovativ Müəllimlər Assosiasiyası" layihəsi çərçivəsində "Pedaqoji ideyalar" festivalında şəhər 10, 11, 12, 18, 19, 20 saylı, Kiş kənd 1 saylı, Suçma, Aşağı Göynük kənd orta məktəblərinin 22 nəfər müəllimi öz dərs nümunələri ilə iştirak etmişdir. Həmin nümunələrin beşi festivalın I toplusunda, 17-si isə II toplusunda çap olunmuşdur.
Azərbaycan Respublikası Təhsil Nazirliyi, Dövlət Neft Şirkəti, Eko- logiya və Təbii Sərvətlər, Fövqəladə Hallar Nazirlikləri və "Çağ Öyrətim" işlətmələri şirkətinin təşkilatçılığı ilə keçirilən Beynəlxalq I Bakı ətraf mühitin mühafizəsi "İNEPO- EUROASİA" layihə olimpiadasında şəhər 12 saylı orta məktəbin coğrafiya müəllimi Kifayət Əhmədovanın rəhbərlik etdiyi komanda bürünc medala və pul mükafatına layiq görülmüşlər.
Ümumi təhsilin dövlət və cəmiyyət qarşısında ən mühüm vəzifələrindən biri də ayrı-ayrı sahələr üzrə istedadlı, xüsusi qabiliyyəti ilə fərqlənən şagirdlərin vaxtında aşkara çıxarılması və onların inkişafı üçün lazımi şəraitin yaradılmasıdır.
Firədun müəllimin hesabat məruzəsində bu vacib məsələyə xüsusi yer ayrıldı. Və möhtərəm Prezidentimiz İlham Əliyevin təsdiq etdiyi "Xüsusi istedada malik olan uşaqların (gənclərin) yaradıcılıq potensialının inkişafı" üzrə Dövlət Proqramında (2006-2010-cu illər) istedadlı uşaqlar barədə məlumat bankının, internet proqramının yaradılmasından, bu sahədə qabaqcıl dünya təcrübəsinin öyrənilib tətbiqindən tutmuş, yeni tipli təhsil müəssisələri şəbəkəsinin genişləndirilməsi, lisey və gimnaziyaların maddi-tədris bazasının möhkəmləndirilməsi və istedadın stimullaşdırılmasınadək bütün məsələlərin öz əksini tapdığından razılıq hissilə danışdı.
Və eyni zamanda bildirildi ki, istedadlı şagirdlərlə işə Şəkinin ümumtəhsil məktəblərində də xüsusi önəm verilir. Bu məqsədlə məktəblərdə istedadlı uşaqların siyahısı hazırlanmış və onların fəaliyyəti diqqət mərkəzində saxlanılır. Bu Dövlət Proqramının icrası ilə əlaqədar istedadlı uşaqlarla iş təcrübəsinə malik müəllimlər üçün Azərbaycan Müəllimlər İnstitutunda "Xüsusi istedadlı uşaq və gənclərlə fəaliyyətin xarakterik xüsusiyyətləri" mövzusunda müxtəlif vaxtlarda keçirilmiş seminarlarda Şəkidən ayrı-ayrı fənlər üzrə 59 nəfər müəllim iştirak etmişdir.
Təhsil Nazirliyinin Fəaliyyət Planına əsasən yerlərdə riyaziyyat, fizika, kimya, biologiya fənləri üzrə aşkara çıxarılmış istedadlı şagirdlər arasından ən istedadlılarını müəyyənləşdirmək üçün 2008-ci ilin may ayında Bakı şəhərində alim və mütəxəssislərin iştirakı ilə təkrar seçim aparılmışdır. Şagirdlərə riyaziyyat, fizika, kimya fənlərinin hər birindən 50, biologiya fənnindən 75 xüsusi test təklif olunmuş, nəticələr 100 ballıq sistemlə qiymətləndirilmişdir. Şəhər 11 saylı orta məktəbin VIII sinif şagirdi Abduləli Hadızadə 70 bal toplayaraq riyaziyyat fənni üzrə ən yüksək nəticə göstərənlərdən biri olmuşdur. Şəhər 5 saylı orta məktəbin XI sinif şagirdi Gülər İbrahimova fizika fənni üzrə resublika olimpiadasında həvəsləndirici mükafata layiq görülmüşdür. Şəhər 10 saylı orta məktəbin şagirdi Gülər Salamova ümummilli liderimiz H. Əliyevin 85 illiyinə həsr edilmiş "Müstəqil Azərbaycan Heydər Əliyevin şah əsəridir" mövzusunda Bakı şəhərində keçirilən inşa yarışında fəal iştirak etmişdir.
10 saylı orta məktəbin XI sinif şagirdi Asiman Əhədzadə, 18 saylı orta məktəbin XI sinif şagirdi Nigar Şərifli, 17 saylı orta məktəbin XI sinif şagirdi Elvin Musayev ABŞ Dövlət Departamentinin keçirdiyi Gənc Liderlərin mübadiləsi (FLEX) proqramının qalibi olaraq ABŞ-da təhsil almaq hüququ qazanmışlar.
Məruzəçi gənc istedadlarla əlaqədar qazanılan uğurların heç də bu sahədə aparılan işlərin tam qaydasında olduğunu deməyə əsas vermədiyini bildirdi. Şəki məktəblilərinin fənn olimpiadalarının respublika turundakı çıxışlarının nəticələri Şəki təhsilini qane etmir.
Görünür, şagirdlərin fənn olimpiadalarına hazırlanmasında və seçimində nöqsanlara yol verilmişdir. Güman etmək olar ki, Şəkinin imkanlı adamları və şirkətləri tərəfindən olimpiada iştirakçısı olan şagirdlərin və onların müəllimlərinin fəaliyyətinin stimullaşdırılmasına, bu işdə dönüş yaradılmasına kömək edə bilərlər.
Məlum olduğu kimi, Azərbaycan Respublikasının Prezidenti cənab İlham Əliyev "İlin ən yaxşı ümumtəhsil məktəbi" və "İlin ən yaxşı müəllimi" mükafatlarının təsis edilməsi haqqında sərəncam imzalamışdır. Bu sərəncamın icrası ilə əlaqədar Təhsil Nazirliyinin 27 noyabr 2007-ci il tarixli məktubuna əsasən şəhər 19 saylı orta məktəbin müəllimləri Ədalət Musayeva və Fikrət Əsgərov, 11 saylı orta məktəbin müəllimləri Ruhangiz Abdullayeva və Xatirə Abudlayeva, şəhər 20 saylı orta məktəbin müəllimi Mahir Əyyubov "İlin ən yaxşı müəllimi" müsabiqəsində, şəhər 5 saylı və H. Əliyev adına Kiş kənd 1 saylı orta məktəblər isə "İlin ən yaxşı məktəbi" müsabiqəsində iştirak etmişlər. Konfransda bu mötəbər müsabiqələrdə iştirak etmiş müəllimlərin və məktəb rəhbərlərinin niyyətini və cəsarəti xatırlandırıldı və alqışlandı.
Biliklərə əsaslanmış iqtisadiyyatın təşəkkül tapdığı şəraitdə informasiya və kommunikasiya texnologiyalarının inkişafı ölkənin intellektual və elmi potensialının vacib göstəricilərindən biridir. Məruzəçi və çıxış edənlər tam əminliklə bildirdilər ki, bu gün qloballaşan dünyada ölkələrin rəqabət qabiliyyəti, ilk növbədə onların İKT-dən səmərəli istifadəsi ilə müəyyənləşməklə formalaşır.
Məruzədə bir daha göstərildi ki, ölkə prezidentinin sərəncamı ilə təsdiq edilmiş "Ümumtəhsil məktəblərinin İKT ilə təminatı" Proqramı bu istiqamətdə atılmış ən mühüm addım olmuşdur. Şəki ŞTŞ üzrə 83 ümumtəhsil məktəbində 666 ədəd kompüter və digər İKT avadanlığı, 17 ədəd notbuk və projektor yerləşdirilmişdir. 37 məktəbdə kompüter sinifləri fəaliyyət göstərir. Şəkidə çətin ki, kompüterlə işləməyi sevməyən məktəbli tapmaq olsun. Artıq elektron vəsaitlər həm şagirdlərin, həm də müəllimlərin diqqətini ciddi şəkildə səkməyə başlamışdır.
Bütün bunlarla bərabər qeyd edildi ki, Şəkinin Ümumtəhsil məktəblərində müasir informasiya və kommunikasiya iexnologiyalarının tətbiqinin hazırki səviyyəsi günün tələblərindən uzaqdır. Şəkinin 18 məktəbinə kompüter texnikası verilməmiş, 73 orta məktəbdən cəmi 3 məktəb internetə çıxış imkanlarına malikdir. Söz yox ki, Azərbaycan Respublikası Prezidentinin 10 iyun 2008-ci il tarixli sərəncamı ilə təsdiq edilmiş 2008-2012-ci illərdə Azərbaycan Respublikasında təhsil sisteminin informasiyalaşdırılması üzrə Dövlət Proqramının yerinə yetirilməsi ilə bütün respublika kimi, Şəkinin təhsil müəssisələrinin informasiya-kommunikasiya üzrə maddi-texniki bazası təkmilləşdiriləcək, kompüter avadanlığı və digər zəruri avadanlıqla təminatı işi daha da yaxşılaşdırılacaqdır.
Məruzədə və çıxışlarda göstərildi ki, torpaqlarımızın 20 faizinin işğal olunması, ümumiyyətlə, Cənubi Qafqazdakı hərbi-siyasi durum gənclərin çağırışa qədər ki, hazırlığına və hərbi-vətənpərvərlik tərbiyəsinə xüsusi diqqət yetirilməsini tələb edir. Məktəblərimizdə gənclərin çağırışa qədər ki, hazırlığı fənləri bir polkovnik, bir kapitan, 24 baş leytenant, 4 gizir, 17 çavuş və döyüşlərdə iştirak etmiş 2 əsgər tərəfindən tədris olunur. Hər il olduğu kimi, 2007-2008-ci tədris ilində də Şəkidə yerləşən hərbi hissələrlə birgə illik tədbirlər planı işlənib hazırlanmış, nəzərdə tutulmuş bütün tədbirlərin yerinə yetirilməsi təmin edilmişdir. Şəki məktəblərinin Dövlət Sərhəd Xidmətinin 2006-cı hissəsi ilə əlaqəsi daha sıx olmuşdur. Kiş kənd 2 saylı orta məktəbin şagirdi Türkan Eyvazlı inşa müsabiqəsində fərqləndiyinə görə, Sərhəd Qoşunları Respublika Qərargahı tərəfindən fəxri-fərman və qiymətli hədiyyələrlə təltif olunmuşdur.
H. Əliyevin anadan olmasının 85-ci ildönümü münasibəti ilə Könüllü Hərbi Vətənpərvərlik Texniki İdman Cəmiyyətinin Şəki Avtomobil məktəbində şəhər məktəbləri arasında keçirilən "Mahir nişançı" devizi altında atıcılıq yarışında şəhər 6. 10, 9 saylı orta məktəblərin komandaları müvafiq olaraq I, II, III yerləri tutmuşlar. "Lider" televiziyasının informasiya dəstəyi ilə keçirilən Sərhəd hərbi idman oyunlarının zona turunla Şin kəndinin "Marxal" komandası III yerə layiq görülmüşdür.
Cəsurlar hərbi-idman oyunlarının şəhər birinciliklərində 8, 19 saylı və Şəki liseyinin "Şahin" hərbi idman oyunlarında 19, 11, 5 saylı məktəblərin "Vətənin müdafiəsinə hazıram" hərbi-idman oyunlarında 8, 11, 18, 19 və Oxud kənd orta məktəblərinin komandaları fərqlənmişlər.
Ali hərbi məktəblərə, C. Naxçıvanski adına hərbi liseyə qəbulla bağlı peşə yönümlü işləri aparılmış və bunun nəticəsi olaraq ali hərbi məktəblərə 38 nəfər, hərbi liseyə isə 29 nəfər gənc sənəd vermişdir. Qəbul imtahanlarının nəticələrinə görə 26 nəfər şəkili gənc ali hərbi məktəblərə, 13 nəfər isə hərbi liseylərə daxil olmuşdur.
Konfransda qeyd edildi ki, hərbi idman oyunları üzrə komandalarımız zona və respublika yarışlarında hələlik lazımi nəticələr göstərə bilmirlər.
2007-2008-ci tədris ilində Şəkidə 6 məktəbdənkənar tərbiyə müəssisəsi fəaliyyət göstərmişdir. Bu müəssisələrdə məktəblilərin asudə vaxtının səmərəli təşkili üçün 449 qrup yaradılmış, həmin qruplara 6329 nəfər şagird cəlb olunmuşdur.
Məktəbəqədər təhsil, vahid təhsil sisteminin ilk pilləsi olmaqla uşaqların intellektual fiziki və psixoloji inkişafında, onların şəxsiyyətinin formalaşmasında xüsusi əhəmiyyətə malikdir. Müasir Azərbaycanın dünya standartlarına uyğun təhsil sistemi yaratmaq niyyəti, onun ilkin pilləsi olan məktəbəqədər tərbiyə və təlimin təkmilləşdirilməsi zərurətini yaradır. Hazırda Şəkidə 60 məktəbəqədər tərbiyə müəssisəsi fəaliyyət göstərir. Uşaq bağçalarında 379 nəfər pedaqoji işçi çalışır ki, bunlardan 41 nəfəri ali, 267 nəfəri pedaqoji orta, 71 nəfəri ümumi orta təhsillidir. 5 yaşlıların məktəb təhsilinə hazırlığı ilə bağlı 601 nəfər uşaq uşaq bağçalarında məktəbə hazırlıq qruplarına cəlb olunmuşdur. Bu da rayon üzrə 27 faiz təşkil edir. Uşaqların məktəb təhsilinə hazırlığı ilə bağlı 9, 17, 21, 22 saylı və Cəfərabad kənd uşaq bağçalarında açıq məşğələlər keçirilmişdir.
Konfransda göstərildi ki, ümumtəhsil orta məktəblərinin fəaliyyətinin qiymətləndirilməsində əsas göstəricilərdən biri də ali məktəblərə qəbulda məzunlarının göstərdiyi nəticələrdir. Bütün respublika ictimaiyyətinin böyük maraqla izlədiyi ali məktəblərə qəbul imtahanları və abituriyentlərin ali məktəblərə yerləşdirilməsi prosesi artıq başa çatmışdır. 2008-ci ildə Şəkinin ümumtəhsil orta məktəblərini bitirmiş 2158 nəfər məzundan 1250 nəfəri ali təhsil almaq üçün sənəd vermiş, onlardan 479 nəfəri tələbə adını qazanmışdır. Sevindirici haldır ki, məzunlardan 50 nəfəri 600 baldan yuxarı bal toplayaraq respublikamızın nüfuzlu ali məktəblərinə daxil olmuşdur. Şəhər 5 saylı orta məktəbdən 6 nəfər, 7 saylı orta məktəbdən 5 nəfər, 11 saylı orta məktəbdən və 10 saylı orta məktəbdən 4 nəfər, Şəki liseyindən 4 nəfər, şəhər 17, 18, 19 saylı, Böyük Dəhnə kənd 1 saylı orta, Orta Zəyzid kənd 1 saylı, Vərəzət kənd orta məktəblərin, türk liseyinin hər birindən 2 nəfər, şəhər 14 saylı, şəhər 3 saylı, Baltalı, Cunud, Qaratorpaq, Bideyiz, Aşağı Göynük, Baş Layısqı, Köndələn, II Biləcik, Qoxmuq kənd orta məktəblərinin hər birində 1 nəfər 800 baldan yuxarı nəticə göstərmişlər. Belə məzunlardan bir çoxunun adları çəkildi.
Şəkinin təhsil sahəsindəki mövcud reallıq bu gün elədir ki, ali məktəblərə qəbulun nəticələrində uğurlar ümumtəhsil məktəbi pedaqoji kollektivlərinin fərdi qaydada dərs keçən repetitorların və müxtəlif hazırlıq kurslarının əməyinin birgə nəticəsidir və burada kimin əməyinin xüsusi çəkisinin çox olmasını müəyyən etmək müşkül bir məsələdir.
Konfrans ümidvar olduğunu bildirmişdir ki, məzunların ali məktəblərə qəbulunda mühüm rol oynayan bu üç komponent yuxarı sinif şagirdlərinin dərsə davamiyyətinin normal olmasına, şagirdlərin məktəbdə öyrənilən bütün fənlər üzrə dərin və hərtərəfli bilikli olmalarına mane olmayacaqdır. Çünki əks halda, 2009-cu ildə mərkəzləşmiş qaydada cavab kartı tətbiq edilməklə test üsulu ilə 8 fəndən keçirilən buraxılış imtahanlarının nəticələrinə görə bəzi fənlər üzrə ən yüksək hazırlığa malik şagirdlər belə attestat almaya bilərlər. Bunu təhsilin bütün iştirakçıları, o cümlədən valideynlər və ictimaiyyət bütün məsuliyyəti ilə dərindən anlamalıdırlar.
Məruzədə qeyd olundu ki, bir neçə gündən sonra respublikamızın bütün təhsil müəssisələrində yeni dərs ili başlanır. Yeni tədris ili ərəfəsində Şəkidə də ümumtəhsil məktəbləri üçün yeni bina və əlavə tədris korpuslarının tikintisinə, əsaslı təmirinə xüsusi diqqət yetirilmişdir.
Hazırda Baş Göynük kənd 2 saylı, Kiçik Dəhnə kənd 2 saylı orta məktəblərinin hər biri üçün 640, Aydınbulaq və Dərəcənnət kənd orta məktəbləri üçün 240, Kosalı və Aşağı Kəldək əsas məktəbləri üçün isə hərəsi 80 şagird yerlik yeni binalar tikilir. Dövlət Proqramı çərçivəsində, büdcə vəsaiti hesabına inşa olunan məktəb binalarının yeni dərs ilində istifadəyə verlməsi nəzərdə tutulmuşdur.
2008-2012-ci illər üzrə qəbul olunmuş inkişaf layihəsində Şəkinin ümumtəhsil məktəblərinin 14-nün yenidən tikilməsi, 42 məktəbin isə əsaslı təmiri nəzərdə tutulur.
Konfransda belə bir faktın da üzərində dayanıldı: bəzi məktəblərin dəhliz və foyelərinin, eləcə də kabinet və sinif otaqlarının tərtibatında zövqsüzlüyə yol verilir. Müasir estetik baxışlardan və dizayn elementlərindən istifadə olunmur. Şagirdlərin əl işlərindən və rəsm əsərlərindən təşkil edilmiş sərgilər aylarla və hətta illərlə dəyişdirilmir. Hər bir sərgi mövsümi xarakter daşımalı, vaxtı bitdikdən sonra sökülməlidir.
Konfransda vurğulandı ki, ölkəmizdə keçiriləcək Prezident seçkilərinə 1 aydan bir qədər artıq vaxt qalır. Hörmətli Prezidentimiz İlham Əliyevin hakimiyyətdə olduğu dövrdə ölkəmizdə istehsal prosesləri genişləndirilmiş, iqtisadiyyatımız sürətlə inkişaf etmiş, yeni iş yerləri açılmış, bütün sosial sahələr o cümlədən təhsil davamlı inkişaf yoluna qədəm qoymuşdur. Bütün qədirbilən xalqımız kimi, Şəkinin təhsil işçiləri də bu seçkilərdə fəal iştirak etməklə - cənab İlham Əliyevi dəstəkləyəcək, gənc liderimiz gənc dövlətimizin bir daha Prezidenti seçiləcəkdir.
Sonra çıxış etmək üçün söz Təhsil Nazirliyinin nümayəndəsi – Təhsil Problemləri İnstitutunun direktoru, akademik Abdulla Mehrabova verildi. O, qarşıdan gələn yeni dərs ili münasibətilə Şəkinin çoxminli təhsil işçilərini təbrik etdi və əmin olduğunu bildirdi ki, keyfiyyətli biliyə söykənən təhsil sisteminin Şəkidə də davamlı inkişafı üçün Şəki müəllimləri əllərindən gələni əsirgəməyəcəklər.
Konfransın işində Şəki Şəhər İcra Hakimiyyəti başçısının müavini Zərinə xanım Cavadova iştirak etmişdir.
ŞƏKİ MƏKTƏBLƏRİNİN 479 NƏFƏR MƏZUNU ÖLKƏNİN ALİ TƏHSİL OCAQLARININ TƏLƏBƏSİ OLMUŞDUR
ŞƏKİ ŞƏHƏR İCRA APARATINDA GÖRÜŞ
Şəki Şəhər İcra Hakimiyyətinin iclas zalında bu il ölkənin ali məktəblərinə qəbul olunmuş şəkili gənclərlə və onların valideynləri ilə birgə şəhər ictimaiyyətinin görüşü keçirilmişdir. Görüşü giriş sözü ilə Şəki Şəhər İcra Hakimiyyətinin başçısı Nazim İbrahimov açmış, şəhər təhsil şöbəsinin müdiri Firədun İbrahimov, şəhər icra hakimiyyəti başçısının müavini Zərinə Cavadova Şəki məktəblərinin bu ilki məzunlarının uğurlarından danışmışlar. Bildirilmişdir ki, məzunlarımızdan 479 nəfəri ali məktəblərə qəbul olunmuşdur. Bu göstərici keçən dərs ili üzrə 264 nəfər çox olmuşdur. 50 nəfər məzun 600 baldan yuxarı nəticə göstərmişdir. Keçən il belə uğuru 21 şagird qazanmışdır.
Görüşdə ən yüksək bal toplayanları adları açıqlanmışdır:
Şəki liseyinin məzunu Nərmin İslam qızı Əhmədli 695 bal toplayaraq Azərbaycan Tibb Universitetinin müalicə işi ixtisasına, Vərəzət kənd orta məktəbinin məzunu Şahin İlham oğlu Həsənov 681 bal toplayaraq Azərbaycan Respublikası Prezidenti Yanında Dövlət İdarəetmə Akademiyasının menecment ixtisasına, şəhər 18 saylı orta məktəbin məzunu Nigar Rövşən qızı Şərifli 680 bal toplayaraq Qafqaz Universitetinin Beynəlxalq iqtisadi münasibətlər ixtisasına, Baltalı kənd orta məktəbinin məzunu Bəhruz Vidadi oğlu Məmmədov 675 bal toplayaraq Azərbaycan Respublikası Prezidenti Yanında Dövlət İdarəetmə Akademiyasının beynəlxalq münasibətlər ixtisasına, Şəki Türk Özəl Liseyinin məzunu Azər Məlum oğlu Şükürzadə 675 bal toplayaraq Qafqaz Universitetinin avtomatlaşdırma sistemlərinin və hesablama texnikasının proqram təminatı ixtisasına, Böyük Dəhnə kənd 1 saylı orta məktəbinin məzunu Aytac Eynulla qızı Məsimova 671 bal toplayaraq Azərbaycan Respublikası Prezidenti Yanında Dövlət İdarəetmə Akademiyasının hüquqşünaslıq ixtisasına, şəhər 3 saylı orta məktəbin məzunu Cəsur Mülkədar oğlu Həsənov 670 bal toplayaraq Qafqaz Universitetinin avtomatlaşdırma sistemlərinin və hesablama texnikasının proqram təminatı ixtisasına, Cunud kənd orta məktəbinin məzunu Sevinc Neymət qızı Əzizzadə 670 bal toplayaraq Bakı Dövlət Universitetinin Beynəlaxlq İqtisadi Münasibətlər ixtisasına, şəhər 10 saylı orta məktəbinin məzunu Mətin Qalib oğlu Süleymanzadə 665 bal toplayaraq Azərbaycan Tibb Universitetinin müalicə işi fakültəsinə, 10 saylı orta məktəbin məzunu Könül Telman qızı Kərimova 661 bal toplayaraq Azərbaycan Respublikası Prezidenti Yanında Dövlət İdarəetmə Akademiyasının politologiya fakültəsinə, şəhər 18 saylı orta məktəbin məzunu Səbinə Rüstəm qızı Şərifzadə 660 bal toplayaraq Azərbaycan Tibb Universitetinin müalicə işi fakültəsinə, 11 saylı orta məktəbin məzunu Simuzər İmran qızı Cabbarova 658 bal toplayaraq Bakı Dövlət Universitetinin tətbiqi riyaziyyat ixtisasına, Qaratorpaq kənd orta məktəbinin məzunu Çinarə İlham qızı Məmmədova 655 bal toplayaraq Qafqaz Universitetinin tərcüməçilik ixtisasına, şəhər 7 saylı orta məktəbin məzunu Nəcibə Nazim qızı Yusifzadə 651 bal toplayaraq Azərbaycan Tibb Universitetinin müalicə işi ixtisasına, şəhər 5 saylı orta məktəbin məzunu Cəlil Seyran oğlu Abdurəhimli 650 bal toplayaraq Azərbaycan Dövlət Neft Akademiyasının faydalı qazıntı yataqlarının işlənməsi ixtisasına daxil olmuşlar.
Görüşdə qeyd edildi ki, 2007-ci il ilə müqayisədə istər məzunları ali məktəbə daxil olan məktəblərin, istərsə də məzunları 600 baldan yuxarı bal toplayan məktəblərin coğrafiyası genişlənmişdir. Məsələn, əgər 2007-ci ildə Şəkinin 13 orta məktəbindən 21 nəfər məzun 600 baldan yuxarı bal toplamışdırsa, 2008-ci ildə 23 orta məktəb üzrə 49 nəfər 600 baldan yuxarı bal toplanmışdır. 2007-ci ildə 56 orta məktəb üzrə 385 nəfər məzun ali məktəbə daxil olduğu halda, 2008-ci ildə 69 orta məktəbdən 475 nəfər məzun ali məktəbə daxil olmuşdur.
Çox fərəhli haldır ki, şəhər 10 saylı məktəbdən 35 nəfər, 5 saylı məktəbdən 34 nəfər, Şəki liseyindən 27 nəfər, 11 saylı məktəbdən 26 nəfər, 18, 19 saylı şəhər və Oxud kənd orta məktəblərinin hər birindən 18 nəfər, Turan qəsəbə orta məktəbindən 14 nəfər sentyabr ayından müxtəlif ali məktəblərin I kurslarında təhsil alacaqlar.
Görüşdə çıxış etmək üçün söz şəhər ictimaiyyətinin nümayəndələrinə və valideynlərə verilmişdir. Onlar Şəki məktəbləri məzunlarının qazandığı uğurlarına sevildiklərini bildirmiş və gələcək tələbəlik illərində bu nailiyyətlərini daha da möhkəmləndirməyi arzulamışlar.
Sonra Şəki Şəhər İcra Hakimiyyətinin başçısı Nazim İbrahimov ali məktəblərə bu ilki qəbul zamanı yüksək bal toplayan şəkili gənclərə qiymətli hədiyyələr təqdim etmişdir.
.
Rəfael MƏNƏFOV,
Şəki Şəhər İcra Hakimiyyəti ictimai-siyasi
şöbəsinin müdiri
Şəkidə gənc seçicilər və liderlər üçün regional təlim kursları başa çatmışdır
AzərTAc xəbər verir ki, Azərbaycan Təfəkkür Gənclər Assosiasiyası ABŞ-ın German Marşal Fondunun proqramı çərçivəsində "Gənc seçicilərin seçki kampaniyasında bilik, fəaliyyət və rollarının təkmilləşdirilməsi" layihəsi çərçivəsində Şəkidə gənc seçicilər və liderlər üçün regional təlim kursları keçirmişdir.
ATGA-nın prezidenti Fəxrinur Hüseynli bildirmişdir ki, layihənin məqsədi qarşıdan gələn prezident seçkiləri zamanı gənc liderlərin, işçilərin və təlimçilərin, eləcə də bu siyasi kampaniyada ilk dəfə iştirak edəcək gənclərin maarifləndirilməsi və onların bu prosesdə iştirakının təmin olunmasıdır.
Şəki Şəhər gənclər və idman idarəsinin təmsilçiləri və yerli QHT-lərin nümayəndələri kursların gənclərin prezident seçkilərində fəal iştirak etməsində mühüm rol oynayacağını vurğulamışlar.
GÖYÇAYDA BARAMAÇILIQ ƏNƏNƏLƏRİ BƏRPA OLUNUR
Bu işdə "Şəki-İpək" ASC-nin rolu böyükdür
"Şəki-İpək" Açıq Səhmdar Cəmiyyəti İdarə Heyətinin sədri Marat Əkbərovun sözlərinə görə, Göyçay rayonunda baramaçılığın bərpası istiqamətində ilk addımlar atılmışdır. Rayon icra hakimiyyətinin aqrar şöbəsindən bildirmişlər ki, bu ildən baramanın satınalma qiymətlərinin artırılması nəticəsində kəndlərdə bu sahənin inkişafına maraq artmışdır. Bu il "Şəki-İpək" ASC-nin Göyçay barama qəbulu məntəqəsinə kəndli-fermerlər tərəfindən daha keyfiyyətli məhsul təhvil verilmişdir.
Rayonun Alpoud, Alxasafa, Dövranlı və Şəkili kəndlərinin barama istehsalçıları bu işdə xüsusilə fərqlənmişlər. Baramaçılığın faydasını görən fərdi təsərrüfat sahibləri artıq indidən gələn mövsüm barədə düşünürlər. Yem bazasını gücləndirmək üçün kəndlilər tut tingləri sifariş verirlər.
Rayonda ipəkçiliyi inkişaf etdirmək məqsədi ilə son iki ildə Şəkidən 31 min ədəd tut tingi gətirilib əkilmişdir.
ZAQATALADA QAÇQINLAR VƏ SIĞINACAQ AXTARAN ŞƏXSLƏRLƏ BAĞLI TƏLİM SEMİNARI KEÇİRİLMİŞDİR
BMT-nin Qaçqınlar üzrə Ali Komissarlığının Azərbaycandakı nümayəndəliyinin təşəbbüsü ilə Zaqatalada qaçqınlar və sığınacaq axtaran şəxslərlə bağlı regional təlim seminarı keçirilmişdir.
Şəki, Zaqatala, Balakən rayonlarının prokurorluq və məhkəmə orqanları nümayəndələrinin iştirak etdiyi seminarda bu rayonlarda məskunlaşmış qaçqın və məcburi köçkünlərə göstərilən yüksək dövlət qayğısından danışılmış, təlimlərin qaçqın və sığınacaq axtaran şəxslərlə iş aparan orqanların əməkdaşlarının bilik və təcrübəsinin artırılmasında çox faydalı olacağına əminlik bildirilmişdir.
Qaçqın hüquqlarının qorunması, qaçqınlarla bağlı mövcud qanunvericiliyin daha təsirli şəkildə icrasının təmin olunması, qaçqın statusunun müəyyənləşdirilməsi prosedurunun icrası ilə bağlı birgə fəaliyyət proqramı, bu sahədə aidiyyəti dövlət orqanlarının səmərəli əməkdaşlığı və digər məsələlər təlim seminarının əsas müzakirə mövzusu olmuşdur.
Təlimləri BMT-nin Qaçqınlar üzrə Ali Komissarlığının Azərbaycandakı nümayəndəliyi hüquq şöbəsinin baş məsləhətçisi Nadir Minbaşıyev aparmışdır.
Mustafa DADAŞOV
QURTULUŞ SÜLEYMANLI
NƏ İMİŞ?
"Dünya və insan" silsiləsindən
Bədəndə min cürə gizlənib günah,
Bunu insan bilir, birdə ki, Allah.
Dostu özüm kimi bilirdim vallah,
Nə bilim vicdanı, içi nə imiş?
Üstümə düşməntək od saçan oldu,
Sirrimi yadlara tez açan oldu.
Qoyub yarı yolda o qaçan oldu,
Gördüm dəyanəti, gücü nə imiş?
Öz kökün üstündə budaq ol, bala,
Mərdin süfrəsinə qonaq ol, bala.
Yalançı dostlardan uzaq ol, bala,
Bil aslan aldadan tülkü nə imiş?
Qəlbi murdarlıqla dolandan qaçın,
Cır toxumdan bitib solandan qaçın.
Çörəyi diz üstə olandan qaçın,
Gör zatı, həm nəsli, ilki nə imiş?
Ay Qurtuluş, etibarsızdan qorun!
Xeyrini görməzsən hər qəlbi görün.
Öyrən görək tamahkarın, nankorun,
Əsli, nəcabəti, kökü nə imiş?.
ƏLLƏRİM
Torpaq becərəndi, daş qaldırandı,
Düşmənin başına od saldırandı.
Kaman dindirəndi, tar çaldırandı,
Nəğmədi, avazdı, səsdi əllərim.
Nahaqdan başlara bərk dəyən deyil,
Özgə budağından bar əyən deyil.
Kimsədən təmənna gözləyən deyil,
Halal yaşamağa bəsdi əllərim.
Cavanı qocalmış yaşda görəndə,
İnsanı daş altda, daşda görəndə.
Namərdi yuxarı başda görəndə,
Titrədi bədənim, əsdi əllərim.
Bir cür bədənimi saxlayan divar,
Düşüb əzablara, çəkib dərd, qübar.
Bir üzü dəmirdi, bir üzü qabar,
Tənbələ ömürlük dərsdi əllərim.
Əlimi boynuna salıb dolandır,
Ayırsan gözlərim yaşla dolandır.
Toxunsan qəlbinə yumruq olandır,
Görərsən necə də tərsdi əllərim.
Torpağın üstünə enib yaşadı,
Zəhmətkeş atına minib yaşadı.
Buzun baltasına dönüb yaşadı,
Poladı, dəmiri əzdi əllərim.
Yaşatdı o məni min maraq ilə,
Yetirdi ruzimi çil-çıraq ilə.
Ömrünü sürmədi təm-təraq ilə,
Torpağın üstündə gəzdi əllərim.
Qurtuluş. Əllərin var nəfəsləri,
Əllərdən ucalar haqqın səsləri.
Mənə pislik edən nankor kəsləri,
Misri qılınc tutub kəsdi əllərim.
ŞƏKİL
"İnsan şəkli ilə yox, öz əməlləri
ilə tanınar"
Müəllif
Yaxşı iş layiqdir hörmətə, ada,
Şəxsiyyət hər zaman düşəcək yada.
Şəkillə tanınmır insan dünyada,
İnsandan yadigar qalandı şəkil.
Yaşa tarixlərin söz yaddaşında,
Qalib gəl həmişə haqq savaşında.
Sürətin qəlblərin dursun başında,
Xalqdan qiymətini alandı şəkil.
Tanın öz işinlə el qabağında,
Məzlumun, şikəstin dur dayağında.
As başın üstündən öz otağında,
Atandı, anandı, balandı şəkil.
Müqəddəs görünür şəkildə insan,
Şəkil də saralıb, solur bir zaman.
Vətənə şərəfli övlad olmasan,
Cansız bir lövhədir, yalandı şəkil.
Qurtuluş, hər şəklə baxaq maraqla,
Həyat da şəkildir, yaşayar xalqla.
Şəklini qəlbində sən gizli saxla,
İnsana arxadır, həyandı şəkil.
BU YOLLAR
"Ömür yolu, torpaq yolu insanındır"
Müəllif
İnsan qüvvət tapar iki qolunda,
Ömür yolu keçər torpaq yolunda.
Biri sağındadı, biri solunda.
İnsanı qoruyur, güdür bu yollar.
Sonacan addımlar atmaq çətindir,
Yorulsan yol üstə yatmaq çətindir.
Yolun son başına çatmaq çətindir,
Bəzən yarı yolda itir bu yollar.
Tanrıdır yolları verib, alan da,
Yolçu yolda qalmaz yollar salanda.
Bədən hərəkətdən düşüb qalanda,
Çatır sonluğuna, bitir bu yollar.
İnsanlar yol üstən gəlib-gedəndir,
Yolun uzunluğu dünya qədərdir.
Torpaq sinəsində qızıl kəmərdir,
Yollardan yollara ötür bu yollar.
Düz yollar deyildir çox yoran bizi,
Təki haqlamasın qar, boran bizi.
Yollardır mənzilə aparan bizi,
Xalqın köməyinə yetir bu yollar.
Yaxşı ol, insanla çalış get yola,
Elin sərvətidir qulluq et yola.
Şəkidən başlanır, çıxır "dörd yola",
Bizi heyran edir, edir bu yollar.
Qurtuluş, dünyaya göz yolu vardır,
Şer misrasının söz yolu vardır.
Ayların, illərin öz yolu vardır,
Ömrün sonlutuna gedir bu yollar.
YNVANIM: Şəki şəhəri, 19-cu rayon, M.Ə.Rəsulzadə küçəsi, ev №256. Telefon: 6-05-94
ŞƏKİNİN QONAĞI OLMUŞ KOREYALI GƏNCLƏRİ ŞƏKİ ŞƏHƏR İCRA HAKİMİYYƏTİNİN BAŞÇISI NAZİM İBRAHİMOV QƏBUL ETMİŞDİR
Şəki Şəhər İcra Hakimiyyətində keçirilən görüşdə çıxış edən Azərbaycan Respublikasının Gənclər və İdman Nazirliyinin gənclərlə iş şöbəsinin baş məsləhətçisi Elçin Nəcəfov bildirmişdir ki, səfər Azərbaycanın qədim tarixə və yüksək mədəniyyətə malik olan Şəki şəhəri ilə tanışlıq məqsədi daşıyır.
Şəki Şəhər İcra Hakimiyyətinin başçısı Nazim İbrahimov Azərbaycan-Koreya əlaqələrinin möhkəmlənməsində, hər iki ölkə gənclərinin bir-birinə yaxınlaşmasında belə görüşlərin əhəmiyyətini yüksək qiymətləndirmiş, şəhərin tarixi, coğrafi mövqeyi, əhalisi, iqtisadiyyatı, mədəniyyəti və turizm imkanları barədə geniş məlumat vermiş, gəncləri maraqlandıran sualları cavablandırmışdır.
Qonaqları ən çox maraqlandıran suallar şəhərimizin iqtisadi inkişafı ilə bağlı olmuşdur ki, bu istiqamətdə də Nazim müəllim Şəkidə tikilən yeni sənaye və istehsal obyektləri barədə geniş məlumat vermişdir.
Koreyalı tələbələr icra başçısına səmimi qəbula görə təşəkkürlərini bildirmiş, bu gözəl şəhərə vurğun olduqlarını söyləmişlər.
Görüşün sonunda icra başçısı tərəfindən qonaqlara xatirə hədiyyələri təqdim olunmuş və xatirə şəkilləri çəkilmişdir.
Sonra koreyalı gənclər regionun ən iri istehsal müəssisələrindən biri olan "Şəki-İpək" ASC-də olmuş, istehsal prosesi ilə maraqlanmışlar. Qonaqlara məlumat verilmişdir ki, 1600 nəfərin çalışdığı müəssisədə istehsal olunan təbii ipəkdən hazırlanan nəfis kəlağayılar, parçalar, gözəl naxışlı xalçalar dünyanın bir sıra ölkələrinə ixrac olunur. Qonaqlar müəssisədə fəaliyyət göstərən "Çeşidlər zalı" və "İpək muzeyi"nə baxmış, burada istehsal olunan məhsullarla yaxından tanış olmuşdular.
Koreyalı tələbələr Kiş kəndindəki qədim Alban məbədi, XVIII əsr Şərq memarlığının nadir incisi olan Şəki xanlarının sarayı, Yuxarı Karvansara ilə tanış olmuşdular.
Koreyalı tələbələr Şəkidən xoş ovqat və zəngin təəssüratlarla ayrılmışlar.
Namiq CABBARZADƏ
Fotolar: Salis'indir
TƏBRİK EDİRİK!
Şəki Şəhər İcra Hakimiyyətinin başçısı Nazim İbrahimovun sərəncamı ilə tanınmış jurnalist, Şəki Müəllimlər İnstitutunun aparıcı müəllimi Sabir Əfəndiyevin anadan olmasının 75 illik yubileyi Şəki mətbuatının bayramı kimi geniş qeyd olunmuşdur.
Xüsusən, şəhər icra hakimiyyətində, müəllimlər institutunda Sabir müəllimin yubileyi ilə bağlı bir çox maraqlı tədbirlər keçirilmiş, onun 50 illik fəaliyyətini əks etdirən sərgi ilə tanışlıq hamıda xoş ovqat yaratmışdır.
Belə görüşlərdən biri də Şəhər Bələdiyyəsində olmuşdur. Burada yubilyara fəxri fərmanlar və qiymətli hədiyyələr təqdim olunmuşdur.
"XALQ VƏ ÜNSİYYƏT" QƏZETİNİ VƏRƏQLƏYƏRKƏN....
ŞƏKİDƏ MƏDƏNİYYƏT VƏ TURİZM İNKİŞAFDADIR
Azərbaycan Respublikası regionlarının sosial-iqtisadi inkişafı Dövlət Proqramına (2004-2008-ci il) əsasən Azərbaycan mədəniyyətinin incisi olan Şəki Xan Sarayında alman şirkəti tərəfindən aparılan bərpa işləri artıq iki il bundan əvvəl başa çatmışdır. Bu gözəl mədəniyyət mərkəzinin ətrafında yaxşı abadlıq işləri görülmüşdür. Azərbaycan Respublikası Prezidentinin müvafiq sərəncamı ilə təsdiq edilmiş "Şəki şəhərinin, Balakən, Zaqatala, Qax rayonlarının sosial-iqtisadi inkişafının sürətləndirilməsinə dair əlavə tədbirlər planı"na (2006-2008-ci illər) əsasən Aşağı-Karvansarayın təmirinə, "Gələrsən-Görərsən" qalasının, Şəki xanının evinin bərpasına başlanacaqdır.
Şəhərin 10 min nəfərdən çox əhali yaşayan yuxarı hissəsində uşaq musiqi məktəbinin açılması məsələsi aktual problemlərdən biridir. Dövlət tərəfindən qorunan tarix-memarlıq abidəsi kimi rəsmi qeydiyyatda olan və hazırda Şəki mərkəzi kitabxanasının bərpası davam etdirilir.
Şəhər İcra Hakimiyyəti Aparatının binası yenidən qurulur. Burada 6 mərtəbəyə xidmət edən lift, binanın ərazisində "Musiqili fantan" istifadəyə veriləcəkdir.
ŞƏKİDƏ HAVANIN ÇİRKLƏNMƏSİ MÜŞAHİDƏ EDİLMƏMİŞDİR
ÖLKƏ ƏRAZİSİNDƏ ƏTRAF MÜHİTİN RADİOAKTİV ÇİRKLƏNMƏSİNİ MÜƏYYƏNLƏŞDİRMƏK MƏQSƏDİ İLƏ MONİTORİNQ KEÇİRİLMİŞDİR
Ətraf Mühit üzrə Milli Monitorinq Departamenti cari ilin 6 ayı ərzində ölkə ərazisində atmosfer havası, yağıntılar, torpaq, sel suları, ətraf mühitin radioaktiv çirklənməsi üzrə monitorinq keçirmişlər.
Ekologiya və Təbii Sərvətlər Nazirliyinin mətbuat xidmətindən AzərTAc-a bildirmişlər ki, ölkənin 8 şəhərində - Bakı, Sumqayıt, Gəncə, Mingəçevir, Şirvan, Naxçıvan və Şəkidə yerləşən 26 müşahidə məntəqəsində atmosfer havasının çirklənməsinin monitorinqi aparılmışdır.
Monitorinqin nəticələrinə görə Bakının bəzi rayonlarında və Sumqayıt şəhərində toz və xlorun orta sutkalıq qatılığı və azot 4-oksid yol verilən qatılıq həddindən (YVQH) artıq olmuşdur.
Gəncə və Mingəçevir şəhərlərində toz, Şirvan şəhərində isə azot 4-oksid YVQH-ni keçmişdir.
Naxçıvan, Şəki, Lənkəran şəhərlərində atmosfer havasının çirklənməsi müşahidə edilməmişdir.
"ŞƏKİNİN SƏSİ" QƏZETİNİN REDAKSİYASINA
OĞUZ RAYONU SİYASİ PARTİYALARI VƏ İCTİMAİ TƏŞKİLATLARI RƏHBƏRLƏRİNİN GÖZLƏRİ İLƏ: "OĞUZ RAYONU HƏLƏ İNDİ-İNDİ ÖZ İNKİŞAF DÖVRÜNÜ YAŞAMAĞA BAŞLAMIŞDIR…”
Hörmətli redaksiya!
Azərbaycan Respublikası Prezidenti cənab İlham Əliyevin sərəncamı ilə Aydın Əlihüseynov 7 ay bundan əvvəl Oğuz Rayon İcra Hakimiyyətinin başçısı təyin edilmişdir. Həmin vaxtdan sanki rayona yeni həyat, yeni nəfəs gəlmişdir. Oğuzluların əhval-ruhiyyəsi xeyli yüksəlmişdir. Hal-hazırda rayonumuz geniş tikinti-quruculuq meydanını xatırladır.
Qısa vaxt ərzində rayonun sosial-iqtisadi inkişafında əsaslı irəliləyişlər baş vermişdir. Rayonda taxıl biçini uğurla başa çatdırılmışdır. Biçilmiş sahələrdən 42.415 ton taxıl yığılmışdır. Bu da Oğuz rayonunun tarixində əldə olunmuş ən yüksək göstəricidir.
Rayonda iribuynuzlu və xırdabuynuzlu mal-qaranın sayı və heyvandarlıq məhsullarının istehsalı da ötən ilin eyni dövrü ilə müqayisədə xeyli artmışdır. Son 7 ayda rayonda 556 yeni iş yerləri açılmışdır. Bununla da Oğuzda işsizlik problemi tamamilə aradan qaldırılmışdır. Hətta, qonşu rayonlardan da işləmək üçün Oğuza gələnlərin sayı gündən-günə artır.
Rayonumuzda tikinti-quruculuq və abadlıq işləri geniş vüsət almışdır. Hazırda olimpiya idman kompleksində, 100 çarpayılıq xəstəxanada, müasir tələblərə cavab verən yeni parkın tikintisində “Qlükoza” zavodunun və digər obyektlərin inşasında qızğın iş gedir. Oğuz şəhərinin küçələri yenidən qurulur, işıqlandırma sistemi quraşdırılır.
Rayonda turizmin inkişaf etdirilməsi üçün müəyyən tədbirlər, layihələr həyata keçirilir, yeni istirahət obyektləri tikilib istifadəyə verilir. Ötən 7 ayda Oğuzda yüzlərlə fərdi yaşayış evi tikilmiş və tikilməkdədir. Bir sözlə, rayonumuz hələ indi-indi öz inkişaf dövrünə qədəm qoymuşdur. Çox keçməz ki, bu "balaca" rayon ölkənin ən iri abad, gözəl, yaraşıqlı rayonlarından biri kimi tanınacaq.
Təəssüf hissilə qeyd etmək istərdik ki, bu gün ölkəmizin hər yerində olduğu kimi, Oğuzda da gedən belə böyük tikinti-abadlıq, quruculuq işlərini, inkişafı gözləri götürməyənlər tapılır. Biz belə "tip"ləri "qara qüvvələr" hesab edirik. Lakin onların "nazı" ilə oynamağa vaxtımız yoxdur. Belələrini daim ifşa etməyə, zərərsizləşdirməyə gücümüz çatır. Belə vicdansız adamlar ölkədə heç bir oxucusu və abunəçisi olmayan "Təzadlar" qəzeti vasitəsilə rayonda görülən böyük işləri "qaralamaq", "alt-üst" etmək fikrinə düşmüş, hamımızın sevimlisi olan rayonun təzə icra hakimiyyətinin başçısı Aydın Əlihüseynov haqqında xoşagəlməz, şər və böhtan yazıları ilə onu ruhdan salmaq, "əl-qolu"nu boşaltmaq istəyirlər. "Təzadlar"ın belə "fəallıq" göstərməsinin səbəblərini isə başa düşmək çətin deyil. Bu qəzet təkcə Oğuzu yox, bütün xalqımızı təhqir etməklə məşğuldur. Özünün hər sayında "Qarabağı xilas etməyən xalqı Allah da xilas etməyəcəkdir" zəhlətökən - "hədələyici" sözləri ilə nəyə "işarə" vurduğunu bir "zəli" kimi yaddaşlara həkk etdirir.
Bizlər - Oğuz rayonunda fəaliyyət göstərən siyasi partiyaların və ictimai təşkilatların rəhbərləri rayonun hüquq-mühafizə orqanları ilə birlikdə dövlətə və dövlətçiliyə qarayaxan, haqsız olaraq rayon rəhbərliyini şər və böhtanlarla ləkələməyə çalışan belə "qara qüvvə"lərin ifşa olunması üçün əlimizdən gələn hər şeyi edəcəyik. Oğuzlular yaxşı başa düşür və dərk edirlər ki, Oğuz rayonu indi-indi əsl yüksəliş, inkişaf yoluna qədəm qoymuşdur. Bu rayonun gələcəyi daha parlaq və işıqlı olacaq, ölkənin tanınmış rayonları sırasında öz adına layiq yer tutacaqdır.
HÖRMƏTLƏ:
V. DAVUDOV - Müsavat Partiyası Oğuz rayon təşkilatının sədri, T. ABBASOV - AMİP Oğuz rayon təşkilatının sədri, İ. QOCAYEV - "Ümid" Partiyası Oğuz rayon təşkilatının sədri, Y. MƏMMƏDOV - AXCP Oğuz rayon təşkilatının sədri, D. QASIMOV - BAXCP Oğuz rayon təşkilatının sədri, O. İBRAHİMOV - BQP Oğuz rayon təşkilatının sədri, İ. ABBASOV - Sosial Rifah Partiyası Oğuz rayon təşkilatının sədri və başqaları.
CUNUD KƏNDİNDƏ 29 YAŞLI GƏLİN ÖZÜNÜ YANDIRIB
Şəkidə 29 yaşlı qız özünü yandırıb. Şəki Rayon Polis Şöbəsindən verilən məlumata görə, hadisə Zunud kəndində baş verib.
Kənd sakini, 1979-cu il təvəllüdlü Dilşad Rafael qızı Qarayeva ailə münaqişəsi zəminində üstünə benzin tökərək özünü yandırıb. Zərərçəkən təcili olaraq rayon mərkəzi xəstəxanasına çatdırılıb və həkimlərin səyi nəticəsində onun həyatını xilas etmək mümkün olub. İlkin araşdırmalara görə, D. Qarayevanın özünə qəsd etməsinə baldızı ilə aralarında yaranmış şəxsi münaqişə səbəb olub.
Faktla bağlı Şəki Rayon Polis Şöbəsi tərəfindən araşdırma aparılır.