21avqust2008

Şəki Şəhər Bələdiyyəsində keçirilən qəbulda milli mətbuatın təməl prinsiplərinə toxunan Gülnaz Salamova da diqqətə çatdırmışdır ki, Azərbaycan mətbuatının zəngin tarixi ənənələri vardır. Şəki mətbuatının keçdiyi inkişaf mərhələlərini xatırladan bələdiyyə sədri hazırda yerli mediamızın müstəqilliyin imkanlarından faydalandığını,  

Şəkildə: Şəki Şəhər Bələdiyyəsinin sədri Gülnaz Salamova yerli  media işçiləri ilə görüş zamanı

mətbuatın qarşısında duran vəzifələrin şərəfli və cəmiyyət üçün faydalı olduğunu qeyd etmiş və bildirmişdir ki, Şəki mətbuatı da bu vəzifələri dərk edir və həmin istiqamətdə fəaliyyət göstərir.

Hər iki tədbirdə çıxış edən jurnalistlər ölkədə mətbuat və söz azadlığından, kütləvi informasiya vasitələrinə dövlət qayğısından danışmış, göstərilən diqqət üçün tədbirlərin təşkilatçılarına minnət- darlıqlarını bildirmişlər.

Nazim İbrahimov və Gülnaz Salamova bu görüşlər zamanı mətbuat işçilərinə fəxri fərmanlar, hədiyyələr və pul mükafatları təqdim etmişlər.

                                        "ŞƏKİNİN SƏSİ" 

"TƏZADLAR"I VƏ "YENİ MÜSAVAT"I OĞUZ RAYONUNA  VƏ ONUN HÖRMƏTLİ İCRA BAŞÇISI AYDIN ƏLİHÜSEYNOVA QARŞI QALDIRANLAR KİMLƏRDİR?

Bəri başdan xatırladaq ki, "Təzadlar" qəzetinin Oğuz rayonunda nə bir nəfər daimi oxucusu və nə də abunəçisi var. Bu qəzet oğuzlular üçün tamamilə "yad" qəzetdir. Qəzetin baş redaktoru da etiraf edib deyə bilər ki, o, respublikada belə "cənnət-məkan" adlı rayon olduğundan indiyədək xəbərsiz olmuşdur. Çünki "Təzadlar"ın səhifələrində bu rayon haqqında bir dəfə də olsun heç bir material getməmiş, rayonun adı heç vaxt çəkilməmişdir. Bundan isə belə haşiyə çıxarmaq mümkündür ki, "Təzadlar"ı belə rayonlarla, o cümlədən Oğuzla bağlayan həmin rayonlarda olan "zəli" tipli təxribat törətməklə məşğul olan nadürüst, fırıldaqçı - "qara qüvvə"lərdir. Əgər belə olmasaydı, "Təzadlar"ın qapısına çoxdan qara qıfıl vurulmuşdu.

"Təzadlar"ın 29 iyul 2008-ci il tarixli sayının gözlənilmədən rayonun sərhədlərini aşaraq Oğuzda görülməsi, idarə, müəssisə, təşkilatlara çatdırılması, yağış və "sel suları" kimi az qala bütün əkin sahələrinə "səpələnməsi" rayonda gözlənilməz bir hadisə kimi qarşılandı. Hiss olunurdu ki, "Təzadlar"ın həmin sayı respublikada heç kəsə lazım deyilmiş. Bu qəzetin bütün nüsxələrini Oğuzda idi. Sən demə, işin içində iş varmış. Qəzetin həmin sayında Elçin Məmmədlinin imzası ilə verilmiş "İcra başçısı zəliyetişdirmə gölü yaradır" atmacalı yazını görəndə və oxuyanda adamın tükləri biz-biz oldu. Yazıda göstərilən və gətirilən faktların hamısı "qondarma" idi. Oğuz rayonunun indi-indi yüksəliş yolu ilə irəliləməsi, hər yerdə tikinti və abadlıq işlərinə geniş meydan verilməsinə, illərdən bəri yığılıb qalmış problemlərin həlli yollarının tapılması yazı müəllifinin "sayıqlamaları" ilə daban-dabana ziddiyyət təşkil edirdi. Və onun ağıl sarıdan bir qədər “kasad” olduğunu sübut edirdi.

İnanmaq olmurdu ki, belə bir "səbat"sız yazı necə və hansı yolla qəzet səhifəsinə gəlib düşmüşdür. Eşitmişdim ki, Oğuzun təzə icra başçısının təşəbbüsü ilə rayonda farel balıqyetişdirmə təsərrüfatı yaradılır. "Zəliyetişdirmə gölü"nün yaradılması isə heç kəsə gərək deyildi. Yəqin ki, Elçin bəy "farel balıqyetişdirmə" təsərrüfatında olan balıqlarla "zəli"lərin yerini səhv salmışdı, onları bir-birindən ayıra bilməmişdir. 

Deyək ki, əgər söhbət balıqdan yox, "zəli"dən gedirsə, onda qoy Elçin müəllim bizdən inciməsin. Zəli iki cür olur. Biri adamlara fayda verir, digəri isə insanların, heyvanların qanını qəltan edir. Hər yerdə olduğu kimi, elə Oğuzda da, "Təzad"ların özündə də "zəliyə" - oxşar “tir”lər tapılır. Əgər Elçin Məmmədli pis növlü "zəlidən" söhbət açırsa gərək özünü də nəzərdə tutsun. Çünki onun belə üzdəniraq yazısının qəzet səhifəsinə necə gəlib çıxdığını başa düşmək çətin deyil. Axı, ona nə düşüb ki, qələm əlinə götürüb belə bir "əziyyətli" mövzuya girişsin,  havayı vaxt itirsin, hətta mövzu üzərində işləyərkən  cibindən pul da xərcləsin. Bütün bunların heç biri "havayı" başa gəlmir. “Zəli” sözünü onun yadına salan, qələmə almağa vadar edənlər olmuşdur. Əgər “Təzadlar”  belələri ilə iş birliyi yapmasa idi Oğuzda “zəli gölü”nün yaranması haqqında söz-söhbət meydana çıxmazdı. Bu da o deməkdir ki, “sifarişçilər” kimi, Elçin bəyin özünü də “zəli”lər qrupuna  daxil etmək heç kəsdə şübhə doğurmur.  Belə olmasaydı, Elçin bəy heç vaxt  həmin məsuluyyətli işi boynuna götürüb Oğuza “qara ləkə” yaxmaq fikrinə düşməzdi.  Bu rayonun  icra başçısının yaxşı işlərinə kölgə salmağı öz mənliyinə sığışdırmazdı.

Gəlin, Elçin bəyi qınamayaq. Ona görə ki, onun əməkdaşlıq etdiyi "Təzadlar" qəzetinin ağır maliyyə böhranı içində boğulduğundan xəbərdarıq. Elçin bəyin də çörək pulu qələmə aldığı "zəli gölü" kimi mövzulardan çıxır. Əgər Oğuz rayonunda  gözünü icra başçısının postuna dikən, rayonda şuluqluq salan, təxribatlar törətməyə cəhd göstərən bəzi "qara qüvvələr" olmasaydı və belələrinə "Təzadlar" himayədarlıq etməsəydi adı çəkilən "zəlilər"lə haqq-hesabı bir dəfəlik çürütmək mümkün idi.

Elsin bəydən soruşmağa dəyər. Sizin Oğuzdan olan təxribatçılarla "durub-oturmağınız", belələrinə dəstək verməyiniz kimlərə fayda verir? Əslində, heç kimə. Hələ utanmaz-utanmaz onu da deyirsiniz. Oğuzdan yazdığınız mövzular hələ çox olacaq. Növbəti saylarımızda yenilərini sizlərə təqdim edəcəyik. Hədə-qorxuya bir bax, ha… Axı, Oğuz rayonu haqqında hər cür böhtan xarakterli sözlərinizi həmin məqalənizdə şərh edibsiniz. Bundan sonra daha nələr yaza bilərsiniz? Heç bir şey!

Elçin bəyə xatırladırıq ki, əgər  yenidən "zəli"lərdən söz açsanız "Yeni Müsavat"ın əməkdaşı Əfqan Muxtarlının da özünü bu siyahınıza daxil edin. Axı, sizin o böhtançı yazınızdan sonra "Yeni Müsavat"lı həmkarınızda sizin yolunuzla getmişdir. Qəzetin 4 avqust tarixli sayında Oğuza "basqın" etmiş və qəzetində gülünc bir ifadə işlətmişdir ki, rayonun icra başçısı İlham Əliyevi saymır." Hələ ki, istər "Yeni Müsavat"ın  istərsə də "Təzadlar"ın bu gurultulu, bayağı sözlərinə heç kəs reaksiya verməmişdir.

Xatırladaq ki, "Yeni Müsavat"la "Təzadlar"ın bu rayonun gözlənilmədən "qara qüvvələri" ilə birləşməsi, rayonu və onun namuslu insanlarını hörmətdən salmağa cəhd göstərməsi heç də oğuzlular tərəfindən bir mənalı qarşılanmamışdır

Məsələn, Filfilli kənd sakinlərinin həmin qəzetlərdə verilmiş qərəzli materiallara münasibəti belə olmuşdur.

-Biz, kənd nümayəndəliyi, bələdiyyə işçiləri, kənd sakinləri belə hesab edirik ki, hər iki qəzetin əməkdaşları rayonumuzda təxribat törədən "qara qüvvələrlə" birləşərək onlara dəstək olmuş, hal-hazırda da dəstək verməkdə davam edirlər. Məqsədləri ancaq Oğuz rayonunda əhali arasında çaşqınlıq yaratmaq, rayon rəhbərliyinin yüksək səviyyədə olan fəaliyyətinə "ləkə" vurmaqdır.

Biz, Filfilli kənd sakinləri son illərdə, əsasən rayonun icra başçısı cənab Aydın Əlihüseynovun 6 aydan artıq vaxtda Oğuzun sosial-iqtisadi inkişafının artan tempini görür və yüksək qiymətləndiririk. Oğuz öz simasını gündən-günə dəyişir. Tikinti meydanına çevrilən rayonumuzda böyük infrastruktur layihələr həyata keçirilir. Aydın Əlihüseynovun qısa müddət ərzində xalqın etimadını qazanması "qara qüvvə"lərə darlıq edir…

Oğuz rayonunun Top, Yenikənd bələdiyyələrində keçirilmiş iclaslarda da rayonda "təxribat"lar törətməklə məşğul olmaq istəyən qara qüvvələrin ciddi cəzalandırılması tələb edilmişdir.

"ŞƏKİNİN SƏSİ"

AZİM QULİYEV "ÇOX SAĞ OL, PREZİDENT!"  DEYƏRKƏN ONUN BU FİKRİNİN ARXASINDA NƏ DURURDU?

"İdeal" qəzetinin təsisçisinin kim olduğunu qəzetin 1 avqust 2008-ci il tarixli sayından öyrənə bilmədik və onun adına burada rast gəlmədik. Lakin bu ölkədə onu tanımayan az adam tapılar: Jurnalist adını ləkələyən bir şəxs kimi! Qəzetdə adının "gizli" saxlanılıb-saxlanılmamasından asılı olmayaraq mətbuat aləmində çalışanlar çox gözəl bilirlər ki, "İdeal”ın sahibi Nazim Quliyevdir. Və o, keçmiş sovetlər dövrünün "Pravda"sı süquta uğradıqdan sonra özünü onun Azərbaycanda yeganə "varisi" kimi gözə soxmağa çalışır. Doğrudan da, Nazim bəyin bu qəzeti "özgə aləm"dir. Az qala, "abır-həya" bilmədən özünü Azərbaycan mətbuatının "lider qəzeti" kimi təqdim etməkdən belə çəkinmir. Nazim bəyin bu qəzetinin "burnunu" soxmadığı nazirlik, idarə, təşkilat, təsərrüfat qalmamışdır. Qəzet nazirlərin, komitə sədrlərinin, təsərrüfat başçılarının "qənimi"nə çevrilmişdir. Ölkə polisinə də "meydan" sulayır. Tutduğu və keçdiyi yol  isə namuslu insanları ləkələməkdən, hədə-qorxu gəlməkdən, qaralamaqdan – ən başlıcası isə "cibləri"nə girib, "soymaq"dan, bu yolla pul qoparmaqdan başqa bir şeyə xidmət etmir. Nazim bəyi "cibgir-reketçi” jurnalist adlandıranlar səhv etmirlər. Onunla "söz güləşdir"məyin də heç bir mənası yoxdur. Bunu hamı bilir. Çünki hər dəfə özünü 100 faiz haqlı, "rəqibləri"ni isə borclu çıxarmağı bacarır.

Əlbəttə, Nazim Quliyev əldə etdiyi özünəməxsus bu "uğur"larını təkbaşına görə bilməz. Onun "yuxarı" dairələrdə çalışan "dayıları" bu işdə Nazim bəyə ona görə dəstək verirlər ki, qəzetin bu təsisçisinin köməyi ilə xoşlamdığı adamları yerindəcə vurub, "zərərləşdirə" bilsinlər, "ifşa" etsinlər. Nazim bəy də öz növbəsində bu cür "sifarişləri" can-başla yerinə yetirir, beləliklə həm öz yerini və həm də qəzetin mövqeyini möhkəmləndirə bilir.

Faktlara keçək. Nazim bəyin gözü Mətbuat Şurasının sədri Əflatun Amaşovu ona görə götürmürdü ki, ona belə tapşırmışdılar: bu nüfuzlu insanı daim "qaralasın" və "sıradan" çıxarsın. "İdeal" öz səhifələrində onun haqqında heç kəsin ağlına gəlməyən qərəzli materiallara geniş yer ayırırdı. Və az qala, Əflatun Amaşovun qorxulu "düşmən" obrazını yaratmaq üzərində yorulmadan "baş sındır"mağa başladı. "İdeal" daha sonra nazirlərin arxasınca "daş" atır, insanları əsəbiləşdirir yerindəcə "oynatmaq"dan xüsusi zövq alırdı. Qəzetin toxunduğu qərəzli mövzulardan biri də "Azərbaycan" nəşriyyatı və onun baş direktoru oldu. Öz qəzetini bu nəşriyyatda pulsuz çap etdirə bilmədiyi üçün həmin mətbuat ocağına "fahişaxana" damğası vurdu. Belə çıxırdı ki, bir çox nüfuzlu qəzet redaksiyalarının yerləşdiyi bu nəşriyyat binasında nə kimi "hadisə"lər baş verdiyini Nazim Quliyev uzaqdan-uzağa hamıdan qabaq görür, xəbər tutur və hamını "məlumat"landırmaq istəyirmiş. Onun Respublika Dövlət Yol Polisinin rəisi, Meliorasiya Komitəsinin sədri Əhməd Əhmədzadə, təhsil və səhiyyə nazirləri , "525-ci qəzet”in redaktoru, "Ədalət"in baş redaktoru barədə yazdığı "qarayağmalar" da hər yerdə rədd edildi və çox pis qarşılandı. Nazim Quliyev rayonlara da "nüfuz" edir, öz gücünü, nəyə qadir olduğunu yazdığı böhtanla dolu yazılarında "nümayiş" etdirirdi. O, Şəkinin baş həkimi Sehran Məmmədovu da axtarıb tapdı və "yaxaladı". Ondan yüksək məbləğdə "şirinlik" tələb etdi. Cib telefonuna dəfələrlə zəng vurub bu həkimin baş-beynini dəng etdi. Lakin ondan bir şey "qopara" bilmədiyini görüb, ötən il qəzetinin 14 sayında, onu nüfuzdan salan çox qəribə yazılarla çıxış etdi, Şəki səhiyyəsini onun üzərinə qaldırıb qəzəbini bu yolla "soyutmaq" istədi.

Yuxarıda "İdeal”ın adını çəkdiyimiz sayında "Sağ ol, Prezident!" rubrikası altında bir materialla da rastlaşdıq. Həmin yazının sərlövhəsi belə idi: "İqtidar öz qəzetlərinə yardım edir. (?!). Doğrudur, materialın altında Nazim bəyin yox, bir başqasının imzası vardı. O dəqiqə başa düşdük ki, "Sağ ol, Prezident!" sözləri yalnız Nazim Quliyevə məxsus ola bilər. Onun "ikibaşlı" məna kəsb edən bu sözünün arxasında nə durduğunu başa düşmək çətin deyildi. Odur ki, Nazim Quliyevin diqqətinə çatdırırıq ki, ölkə Prezidenti heç də onun yazdığı kimi, iqtidar qəzetlərinə yardım etməmişdir. Bu yardımdan gündəlik çıxan əksər dövlət, iqtidar, müxalifət və müstəqil qəzetlər də faydalanmışdır. Doğrudur, Prezidentin bu yardımından bir neçə qəzet kənarda qalmışdır. Onların arasında "İdeal"da vardır. Belə də olmalı idi. Ona görə  "reketçi" qəzet kimi tanınan və ad çıxaran "İdeal"ın heç bir dövlət yardımına ehtiyac olmadığını hamı bilir. Onsuz da Nazim bəyin özü də yaxşı başa düşürdü ki, "İdeal" kimi simasız bir qəzetə dövlət yardımı edilməsi Azərbaycan mətbuatına hörmətsizlikdən başqa bir şey deyil. Biz Nazim bəyin məqsədini yaxşı başa düşürük. Bilirik ki, əgər onun qəzetinə dövlət tərəfindən yardım edilsə idi, bu, bütün ölkədə pis qarşılanardı. 

Nazim bəy heç vaxt unutmasın ki, o, qəzetçilik sahəsində bir çox qəribə oyunlardan çıxmışdır. Dəfələrlə cəzalandırılmışdır. Məhkəmənin hökmü ilə həbs edilmişdir. Sonuncu dəfə apellyasiya məhkəməsi kimlərinsə xahişini yerinə yetirərək onu azadlığa buraxmışdır. Bəlkə də, bu, ölkədə yeganə hal ola bilər. Nazim Quliyevin, ölkə prezidentinin iqtidar qəzetlərinə yardım etdiyinə görə, ona çox sağ ol! - deməsi heç də yerində işlənməyən sözlərdir və çox bayağı səslənilir. Çünki həmin yazıdakı bəzi məqamlar də bunu təsdiq edir. Həmin materialda göstərilir ki, prezidentin yardımını alanlar sırasında  - "ölkə başçısının, özünün və ailəsinin fəaliyyətini" daim kölgədə saxlayan bir qrup informasiya vasitələri, o cümlədən "Azad Azərbaycan", "Bakinski raboçi", "Bakı-xəbər", "525-ci qəzet", "Respublika", "Yeni Azərbaycan" qəzetlərinin də olması – guya yol verilməzdir. "İdeal" ağ yalan danışır, öz qələm dostlarına böhtan atır. Adı çəkilən qəzetlərin əksəriyyəti doğru yoldadır, xalqın ən çox sevdiyi mətbuat orqanları sırasına daxildir. Bir də ki, bu qəzetlərin heç birinin "İdeal" kimi ikiüzlülü siyasət yeritmədiyini də nəzərə almaq lazımdır.

Həmin yazıda ictimai-siyasi şöbənin müdiri Əli Həsənovun da adı çəkilir və onun "birgə" yanlışlığından söz açılır. Bu məmurun həyat yoldaşının qəzetinə pul yardımı verilməsini böyük bir qəbahət kimi səsləndirilir. Burada isə qəribə heç nə yoxdur. Prezidentin yardımı hamıya verilə bilər. Bu şərtlə ki, onların arasında "reketçi" qəzetlər olmamalıdır. "İdeal" isə belə yardımdan birdəfəlik gözünü kənara çəkməlidir. Nazim Quliyev Heydər Əliyev haqqında təhqir dolu yazı verən "Azadlıq" qəzetinə yardım verilməsinə də öz etirazını bildirir. Bax, bu yerdə Nazim bəyin kiməsə "ağıl" öyrətməsinə ehtiyac qalmır. "Azadlıq" boşboğazlıqla məşğul olan qəzetlərdən biri olsa da "İdeal" kimi "cibəgirən" qəzet deyil. Kimdən, nədən yazdığını özü bilər. Belə qəzetə yardım edilməsinə gəldikdə isə, bu, Prezidentimizin mətbuata olan böyük qayğısından irəli gəlir.

Yeri gəlmişkən təkrar qeyd edək ki, "İdeal"ın heç bir yardıma ehtiyacı yoxdur. Çünki bu qəzetin "gəlir-qazanc" "mənbə"ləri çoxdur. Bunu hamı bilir və təsdiq edir. Lakin "İdeal"ın bu dəfə Prezident yardımından "məhrum" olması, söz yox ki, Nazim Quliyevi möhkəm sarsıtmışdır. Əgər belə olmasaydı "İdeal" heç yazardı ki, "Sağ ol, cənab prezident - iqtidar öz qəzetlərinə yardım edir". Nazim bəyin bu "atmaca"larına cavab olaraq bildiririk ki, iqtidar "İdeal"ın tənqid hədəfinə tuşladığı digər qəzetlərə də öz köməyini etmişdir. Deməli, Nazim bəy nədən, kimdən söz açdığını heç özü də yaxşı bilmir, boşboğazlığa yol verir.

Bir məqamı da diqqətə çatdırıram. Nazim bəyin deməsinə görə, "İdeal"a Prezident yardımının verilməməsinə baxmayaraq onun İlham Əliyev cənablarından heç bir umacağı, təmənnası yoxdur. Həmişə olduğu kimi, bundan sonra da ona təmənnasız xidmət edəcəkdir. (?!).

Bax, "İdeal" "ikibaşlı" söz oyunu ilə öz yazısını belə başa vurur: Prezidentimizə çox sağ deməkdən başqa sözümüz yoxdur. (?!).  Sonra təəssüf hissi bildirir ki, hər halda prezident İlham Əliyevin ətrafında kifayət qədər etibarlı və sədaqətli insanlar var ki, onlar bu cür yanlışlıqlara yol verməməli idilər.(?!).

Yəqin ki, bu "yanlışlıq" "pul yardımı" ilə sıx bağlıdır. Şübhəsiz ki, "Azadlığ"a çatacaq yardım əgər "İdeal"a yönəldilmiş olsa idi, yəqin Nazim Quliyevin keyfi açılar, "reketlik" fəaliyyətini daha da gücləndirə bilərdi.

"Şəkinin səsi" qəzeti isə belə düşünür:  Ölkə prezidentinə bundan sonra da “İdeal”ın sadiq qalıb-qalmamasına  ehtiyacı yoxdur. Bir qəzet ki, ölkə prezidentinin komandasının ən ləyaqətli üzvlərini hörmətdən salmaq üçün, necə deyərlər "dəridən-qabıq"dan çıxırsa, deməli "Azadlıq", "Yeni Müsavat" qəzetlərinin ancaq "astar üzü" hesab edilə bilər. Hər halda, Nazim Quliyev öz müxalifətçi dostlarının yardım almasına "paxıllıq" edirsə, papağını qabağına  qoyub yaxşı-yaxşı fikirləşməli – "Azadlıq" qədər insanların heysiyyatına toxunmaqdan əl çəkməlidir.

M.SALİS.

Qurtuluş Süleymanlı

GÜNLƏRİM

"Hər gün ömür tarixinin bir səhifəsidir."

                                              Müəllif  

Dünyanın tufanı çaxıb başımda,

Quruyub gözümdə axan yaşım da.

Ana itirmişəm körpə yaşımda,

Başlanıb qəm dolu kədər günlərim.

Kirpiyim üstünə od götürmüşəm,

Tale qismətinə tab gətirmişəm.

Üç ağac, altıca gül bitirmişəm,

Onları bəsləyər, güdər günlərim.

Qələm də tutmuşam, əldə kürək də,

Qismətim gizlənib canda, ürəkdə.

Bəzən gözüm qalıb qara çörəkdə,

Çox olub əzablı, betər günlərim.

İnsanlar görmüşəm hər üzü qəmli,

Nankor kefə baxıb, mərd üzü qəmli.

Birisi şən keçib, birisi qəmli,

Bəzən xəyal olub itər günlərim.

Tanrı övladına çörək hər an var,

Bizə ruzi verən o yaradan var.

Hələ ki, canımda nə qədər can var,

Məni yaşatmağa yetər günlərim.

Nankor ürəyinə ox tək batmışam,

Fələk zindanında mən çox yatmışam,

Halal zəhmətimlə başa çatmışam,

Keçməyib heç zaman hədər günlərim.

Sevinc də tapmışam ömür yazımda,

Nəğmələr səslənib könül sazımda.

Qismətim nəqş olub alın yazımda,

Ömrün sonluğunda bitər günlərim.

Dünəni bu gündə axtarmaq olmaz,

Günü iki yerə tən yazmaq olmaz.

Hər keçən günləri qaytarmaq olmaz,

Gedərə, gəlməzə gedər günlərim.

Qurtuluş, sevgisiz gülə bilmərəm,

Qəlbim ilhamlıdır, ölə bilmərəm.

Məni aparacaq deyə bilmərəm,

Bəlkə də çox yaşa qədər günlərim.

         MƏNİM OLSUN

               (LİRİK ŞEİR )

Məhəbbət tarında nəğmələr çalaq,

Ömrün sonluğuna yadigar qalaq.

Vətən torpağında gözəllik salaq,

Çiçək sənin olsun, bağ mənim olsun.

Şerimsən dilimdə sözə dönəndə,

Mələksən gözümdə gözə dönəndə,

Canımız odlanıb közə dönəndə,

Çay olub sinəmdə ax, mənim olsun.

Bütün ömrün boyu mənlə danış tək,

Yandır gözlərimi odlu baxış tək.

Qışda ağ qar kimi, yayda yağıştək,

Yağ başım üstünə, yağ, mənim olsun.

Təzədən qayıdaq gənclik çağına,

Kişdən keçib gedək Qafqaz dağına.

"Marxal"dan adlayaq, "Xan yaylağı"na,

Təpə sənin olsun, dağ mənim olsun.

O keçən günləri qonaq eyləyək,

Bu eşqi sönməyən çıraq eyləyək.

Saçından hörük düz, bayraq eyləyək,

Sinəmin üstünə tax, mənim olsun.

Tanrı qismətindən verilən payam,

Əhdimə sadiqdir, namusum, həyam.

Görsən ki, qəmdəyəm, iztirabdayam,

Sən gül, baxışınla bax, mənim olsun.  

Yenidən dünyaya biz gələn olsaq,

Sevgi payımızı tən bölən olsaq.

Eşqimiz ölməsin biz ölən olsaq,

Yaşasın bu sevgi, sağ mənim olsun.

Kainat tanrıdan, haqdan başlayır,

Sevgimiz vətəndən, xalqdan başlayır.

Dünyanın ilk rəngi ağdan başlayır,

Qara yadın olsun, ağ mənim olsun.

Ölüncə qoruyaq eşqi, bəxti, yar,

Ölməz sevgimizdir Şəki tək diyar.

Qurtuluş, eşqimlə olum bəxtiyar,

Bu vətən, bu torpaq, xalq mənim olsun.

      DÜZ DAŞIM-DAŞIM

                    (Qoşma)

Xəzanda soluxan gül bizə qaldı,

Bu dərdə istəsən gül, bizə qaldı.

Ocaqda od söndü, kül bizə qaldı,

Ağardı saçlarım, tez başım-başım.

Bilmədim bu necə sirdi, apardı,

Nankor qismətimi gördü apardı.

Allah bəlasını verdi, apardı,

Töküldü başına düz daşım-daşım.

Təbiyyət yazlaşdı, xoş avaz gəldi,

İlhamlı qəlbimə ətir, naz gəldi.

Ömrümə yenidən güllü yaz gəldi,

Mən də sular kimi qoy daşım-daşım.

Xoşbəxtlik tapıram insan güləndə,

Sınıram ilk sevgi cavan öləndə.

Gəncliyi narahat, qəmli görəndə,

Bilmirəm necədir öz yaşım-yaşım.

Akifi, Elmiri hara ötürdük,

Elşadı, Vüqarı yerdən götürdük.

İki doğma, iki dostu itirdik,

Axdı gözlərimdən qan yaşım-yaşım.

Niyyətim heç nəyi əzən olmadı,

Kimsədən inciyib, küsən olmadı.

İlahi ruzumu kəsən olmadı,

Oldu həm xörəyim, həm aşım-aşım.

Tapacaq hər zaman bil, xeyir məni,

Yaşadır gözəllik, söz şeir məni.

Təbiyyət ilhama səsləyir məni,

“Marxal” zirvəsindən qoy aşım-aşım.

Qurtuluşam, eşqim, marağım sənsən,

Həyatım, günəşim, ocağım sənsən.

Birinci, sonuncu dayağım sənsən,

Ya Allah, qoyma ki, mən çaşım-çaşım.

ÜNVANIM: Şəki şəhəri, 19-cu rayon, M. Ə. Rəsulzadə küçəsi,  ev №256.Telefon: 6-05-94. QURTULUŞ SÜLEYMANLI 

<<< Ana səhifə